Бамбүү хүүхэд залуучуудын театр нь 2017 онд 0-12 насны хүүхэд багачуудын оюуны болон урлагийн хөгжилд өөрсдийн хувь нэмрээ оруулах зорилготой байгуулагдсан бөгөөд байгуулагдсан цагаасаа хойш 0-4 насны багачуудад гурав, 4-10 настнуудад зориулсан зургаа, 11-18 настнуудад зориулсан нэг гээд нийт 10 шинэ бүрэн хэмжээний хүүхдийн жүжиг өөрсдийн театрын тайзнаа найруулан үзэгч хүүхдүүддээ толилуулаад байна.
2020 оны 2 сард Монгол дах ASSITEJ-ийн төвийг Бамбүү театр байгуулах санаачлага гарган ASSITEJ MONGOLIA төвийг (National center) Монголын Хүүхэлдэйн театр болон Монголын Урлагийн Зөвлөлтэй хамтран үндсэн 3 гишүүнтэйгээр албан ёсоор ASSITEJ International-д бүртгүүлж олон улсын хэмжээнд Монголын хүүхдийн театрын салбарыг хөгжүүлэх олон боломжуудыг эрж, одоо явагдаж буй үйл ажиллагааг сайжруулан өргөжүүлэхэд анхаарч ажиллаж байна.
ASSITEJ Mongolia үндэсний төв байгуулагдсанаас хойш Бамбүү театр олон улсын хүүхдийн театртай холбоотой хурал чуулган, уулзалтуудад удаа дараа оролцож монгол дахь хүүхдийн театрын хөгжлийг олон улсад таниулан дуу хоолойгоо хүргэсээр байгаа билээ.
Тэгвэл бид энэ удаад Пакистан улсын Maas foundation-с зохион байгуулдаг 20 жилийн түүхтэй Maas international festival-д өөрсдийн “Эвтэй дөрвөн амьтан” үлгэрээс сэдэвлэсэн үггүй, хөгжимт, дуулалт “Алим” жүжгээрээ оролцохоор дэлхийн олон орны театрын уран бүтээлүүдтэй өрсөлдөн шалгарч чадсан билээ. 2024 оны 5-р сарын 8-11-ны өдрүүдэд Пакистан улсын Лахор хотод зохион байгуулагдах уг фестивальд мөн Англи, Спани, Франц, Шриланка, Стониа гэх мэт хүүхдийн театрын урлагаар тэргүүлэгч орнууд хүртэл оролцох бөгөөд Монгол улсаа төлөөлөн Бамбүү театр оролцохоор болсон нь Монголын хүүхдийн театрын хөгжилийг олон улсад таниулах томоохон боломж гэж харж байгаа юм.
Төслийн зорилго:
- Монголын хүүхдийн театрын хөгжилийг олон улсад сурталчлах, таниулах
- Бамбүү театрын уран бүтээлчид олон улсын фестивальд оролцож туршлага хуримтлуулан цаашдаа олон улсын хүүхдийн театрын түвшний чанартай уран бүтээлүүдийг туурвиж Монгол улсынхаа үзэгч хүүхдүүдэд хүргэх
- Бусад хүүхдийн чиглэлээр уран бүтээлүүд туурвидаг театр, хувь хүмүүст олон улсад бүтээлээ туурвих боломжийг эрэлхийлэх гүүр болох
Тэгвэл бид энэхүү зорилгоо биелүүлэхэд уран бүтээлчдийн багийн онгоцны тийзний зардал болон тайзаа газрын тээврээр явуулах зардалын хэрэгцээ шаардлага тулгарсан тул санхүүжилт өгөн биднийг дэмжээсэй гэж чин сэтгэлээсээ хүсч байна.
